நாடும் நகரமும்

நாடும் நகரமும்

நாடு :

• நாடு என்னும் சொல் ஆதியில் மக்கள் வாழும் நிலத்தைக்
  குறிப்பதற்கு வழங்கப்பட்டது.
• தமிழர் வாழ்ந்த நாடு தமிழ்நாடு எனப் பெயர் பெற்றது.
• மூவேந்தர்களின் ஆட்சிக்கு உட்பட்ட தமிழ்நாட்டின்
  பகுதிகள் அவரவர் பெயராலேயே சேரநாடு, சோழநாடு,
  பாண்டியநாடு என்று அழைக்கப்பட்டன.
• நாளடைவில் முந்நாடுகளின் உட்பிரிவுகளும் நாடு
  என அழைக்கப்பட்டன. கொங்குநாடு, தொண்டைநாடு
  முதலியன இதற்குச் சான்றாகும்.
• முரப்புநாடு என்பது பாண்டி மண்டலத்தைச் சேர்ந்த
  நாடுகளுள் ஒன்று. இப்பொழுது, அப்பெயர்
  பொருநையாற்றின் கரையிலுள்ள ஒரு சிற்றூரின்
  பெயராக நிலவுகின்றது. அதற்கு எதிரே ஆற்றின்
  மறுகரையில் உள்ள மற்றொரு சிற்றூர் வல்லநாடு
  என்னும் பெயர் உடையது.
• மாயவரத்திற்கு அணித்தாக உள்ள ஓரூர் கொரநாடு
  என வழங்கப்படுகிறது. கூரைநாடு என்பதே கொரநாடு என
  மருவிற்று, பட்டுக்கோட்டை வட்டத்தில் கானாடும்,
  மதுராந்தக வட்டத்தில் தென்னாடும் உள்ளன.

நகரம் :

• சிறந்த ஊர்கள், நகரம் என்னும் பெயரால் வழங்கப்படும்
• நாட்டின் தலைமைசான்ற நகரம் தலைநகரம் எனப்படும்.
• ஆழ்வார்களில் சிறந்த நம்மாழ்வார் பிறந்த இடம்
  குருகூர் என்னும் பழம்பெயரைத் துறந்து,
  ஆழ்வார்திருநகரியாக திகழ்கின்றது.
• பாண்டி நாட்டிலுள்ள விருதுப்பட்டி, வாணிகத்தால்
  மேம்பட்டு இன்று விருதுநகராக விளங்குகின்றது.
  இக்காலத்தில் தோன்றும் புத்தூர்களும் நகரம் என்னும்
  பெயரையே பெரிதும் நாடுவனவாகத் தெரிகின்றன.

சென்னை :

• சென்னையின் பகுதிகளாக இன்று விளங்கும்
  மயிலாப்பூரும் திருவல்லிக்கேனியும் கடற்கரைச்
  சிற்றூர்களாக அந்நாளில் காட்சி அளித்தன.
• மயிலாப்பூரில் உள்ள கபாலீச்சுரம் என்னும் சிவாலயம்
  மிகப் பழைமை வாய்ந்தது. திருஞானசம்பந்தர் அதனைப்
  பாடியுள்ளர்.
• திருமயிலைக்கு அருகே உள்ள திருவல்லிக்கேணி முதல்
  ஆழ்வார்களால் பாடப் பெற்றது. அவ்வூரின் பெயர்
  அல்லிக்கேணி என்பதாகும். அல்லிக்கேணி என்பது
  அல்லிக்குளம்.
• அல்லி மலர்கள் அழகுற மலர்ந்து கண்ணினைக்
  கவர்ந்த கேணியின் அருகே எழுந்த ஊர் அல்லிக்கேணி
  எனப் பெயர் பெற்றது. அங்கே பெருமாள், கோவில்
  கொண்டமையால் திரு என்னும் அடைமொழி பெற்றுத்
  திருவல்லிக்கேணி ஆயிற்று.
• திருவல்லிக்கேணிக்கு வடக்கே மேடும்பள்ளமுமாகப்
  பல இடங்கள் இருந்தன. அவற்றுள் ஒன்று நரிமேடு.

புரம் :

• புரம் என்னும் சொல், சிறந்த ஊர்களைக் குறிப்பதாகும்.
• ஆதியில் காஞ்சி எனப் பெயர் பெற்ற ஊர் பின்னர்,
  புரம் என்பது சேர்ந்து காஞ்சிபுரம் ஆயிற்று.
• பல்லவபுரம், கங்கைகொண்ட சோழபுரம், தருமபுரம்
  முதலியவை மேலும் சில எடுத்துக்காட்டுகள் ஆகும்.

பட்டினம் :

• கடற்கரையில் உருவாகும் நகரங்கள் பட்டினம் எனப்
  பெயர் பெறும்.
• காவிரிப்பூம்பட்டினம், நாகப்பட்டினம், காயல்பட்டினம்,
  குலசேகரப்பட்டினம், சதுரங்கப்பட்டினம் ஆகியவை
  பட்டினம் எனப் பெயர் பெற்ற ஊர்கள் ஆகும்.

பாக்கம் :

• கடற்கரைச் சிற்றூர்கள் பாக்கம் எனப் பெயர் பெறும்.
• பட்டினப்பாக்கம், சேப்பாக்கம், மீனம்பாக்கம்,
  நுங்கம்பாக்கம், கோடம்பாக்கம் இப்படிப் பாக்கம்
  எனப் பெயர் பெற்ற ஊர்களைக் குறிப்பிடலாம்.

புலம் :

• புலம் என்னும் சொல் நிலத்தைக் குறிக்கும்.
  எடுத்துக்காட்டாக மாம்புலம், தாமரைபுலம், குரவைப்புலம்
  முதலியவற்றைக் குறிப்பிடலாம்.

குப்பம் :

• நெய்தல் நிலத்தில் அமைந்த வாழ்விடங்கள் குப்பம்
  என்னும் பெயரால் வழங்கப்பெறும். காட்டுக்குப்பம்,
  நொச்சிக்குப்பம், மஞ்சக்குப்பம், மந்தாரக்குப்பம்,
  முதலியவற்றைக் குறிப்பிடலாம்.